ពិព័រណ៍រូបថត លោក គឹម ហាក់ ជាងថតរូបកម្ពុជា
នៅវិចិត្រសាល BankART Station
ការធ្វើដំណើរមួយតាមរយៈរូបថតហ្វីល និងសំបុត្រស្នេហាមួយទៅកាន់មាតុភូមិកំណើតរបស់លោក

មូលនិធិរៃ មានមូលដ្ឋាននៅប្រទេសណូវែលហ្សេឡង់ មានមោទនៈភាពបង្ហាញ “មាតុភូមិជាទីស្នេហា” ពិព័រណ៍រូបថតមួយ ដោយសិល្បករកម្ពុជា លោក គឹម ហាក់ នៅវិចិត្រសាល BankART Station (នៅទីក្រុង យូកូហាម៉ា ស្ថានីយ៍រថភ្លើង Shin-Takashima) ចាប់ពីថ្ងៃទី២ ដល់១៧ ខែវិចិ្ឆកា ឆ្នាំ២០២៤។ ស្នាដៃពិព័រណ៍នេះ មានរូបចំនួន៥៦សន្លឹកនៃប្រទេសកម្ពុជា ជាមាតុប្រទេសដែលលោក គឹម ហាក់ ចាប់កំណើត ជាទីកន្លែងដែលលោកបន្តរស់នៅ ស្នាដៃនេះផលិតអស់រយៈពេល១០ឆ្នាំ ដោយការធ្វើដំណើរទូទាំងប្រទេសរបស់លោក។ ថ្ងៃទី២ ខែវិច្ឆិកា ជាថ្ងៃដំបូងនៃពិព័រណ៍ មានការបោះពុម្ពសៀវភៅរូបថតដែលមានចំណងជើងដូចគ្នានឹងពិព័រណ៍នេះផងដែរ។ ប្រទេសកម្ពុជា គេដឹងថាអង្គរជាបេតិកភណ្ឌពិភពលោក ហើយប្រវត្តិសាស្ត្រនៃប្រទេសនេះបានជួបប្រទេសនូវចលាចលផ្នែកនយោបាយក្នុងទសវត្សរ៍ឆ្នាំ១៩៧០។ លោក គឹម ហាក់ កើតក្នុងឆ្នាំ១៩៨១ ពីរឆ្នាំក្រោយការដួលរលំនៃរបបខ្មែរក្រហម ហើយលោកធំដឹងក្តីឡើងក្នុងដំណាក់កាលដែលប្រទេសរបស់លោកកំពុងមានការផ្លាស់ប្តូរ និងការអភិវិឌ្ឍន៍យ៉ាងគំហុក។ ក្នុងពិព័រណ៍នេះ គឹម ហាក់ បង្ហាញរូបថតដែលបំភ្លឺយ៉ាងប្រណិត និងភាពចម្រុះសម្បូរបែបទេសភាពនៃប្រទេសកម្ពុជា ដែលមានការកាត់ប្លង់យ៉ាងល្អច្បាស់លាស់ ដោយមិនមានការកែច្នៃបន្ថែមនៃពណ៌ បង្ហាញពីភាពស្រស់ស្អាតជាសកល និងភាពស្ងប់ស្ងាត់ដែលបង្កើតឡើងដោយធម្មជាតិ ជីវិតមនុស្ស និងដំណើរឆ្លងកាត់នៃពេលាវេលា ដែលលោក គឹម ហាក់ ផ្ទាល់ ឃើញថាវាជាទិដ្ឋភាពនៃការផ្លាស់ប្តូរទេសភាព។ វាជារូបភាពពិតនៃប្រទេសកម្ពុជា ទឹកដីដែលសម្បូរដោយសិល្បៈ និងវប្បធម៌ មនុស្សម្នាល្អៗ និងមានធម្មជាតិស្រស់ស្អាត។ មាតុភូមិជាទីស្នេហា ជាសំបុត្រស្នេហាទៅកាន់ប្រទេសកម្ពុជា ប្រទេសដែល គឹម ហាក់ បានសង្កេតរយៈពេល១០ឆ្នាំ។

មាតុភូមិជាទីស្នេហា: គឹម ហាក់ា

បើកពីម៉ោង ១១:០០ - ១៩:០០ ថ្ងៃសៅរ៍ ទី២ ដល់ថ្ងៃអាទិត្យ ទី១៧ ខែវិច្ឆិកា ឆ្នាំ២០២៤
ចូលរួមទស្សនាដោយឥតគិតថ្លៃ
គាំទ្រដោយ មូលនិធិរៃ Rei Foundation Limited
មានកិច្ចសហប្រតិបត្តិការពី TV Man Union Inc., Luftzug, BankART Station Ltd.
រៀបចំពិព័រណ៍ដោយ: តាគូម៉ា ហាយ៉ាស៊ី (Takuma Hayashi)
សម្លេងក្នុងវិចិត្រសាល: ម៉ាសាតុ ហាតាណាកា (Masato Hatanaka)
ទិសដៅបច្ចេសទេស, សមាសភាពទីកន្លែង: យូតាកា អេនដូ (Yutaka Endo)
ទំនាក់ទំនង: hello@reifoundation.com

មាតុភូមិជាទីស្នេហា

ប្រទេសកម្ពុជា មានអ្វីច្រើនយ៉ាង លើសពីអ្វីដែលគេធ្លាប់តែគិតជាទូទៅ ពីរូបភាពនៃប្រាសាទអង្គរវត្ត និងរបបខ្មែរក្រហម។ «មាតុភូមិជាទីស្នេហា» គឺជាការឆ្លើយតបតាមរយៈរូបថតចំពោះគំនិតដែលបានគិតទុកជាមុនអំពីប្រទេសនេះ។ ទីនេះជាកន្លែងដែលខ្ញុំកើត និងធំដឹងក្តីឡើង។ មាតុភូមិ ជាទឹកដីដែលផ្តល់ជីវិតដល់ខ្ញុំ ហើយក៏មានសិល្បៈ និងវប្បធម៌សម្បូរបែប ព្រមទាំងមនុស្សម្នាល្អៗ និងធម្មជាតិដ៏ស្រស់ស្អាតជាច្រើន។

អស់រយៈពេល៧ឆ្នាំ គិតចាប់ពីឆ្នាំ២០០៣ មុនពេលដែលខ្ញុំប្រឡូកខ្លួនទាំងស្រុងចូលទៅក្នុងវិស័យថតរូប ខ្ញុំបានធ្វើដំណើរគ្រប់ទីកន្លែងទូទាំងប្រទេសកម្ពុជា ពេលបំពេញការងារក្នុងឧស្សាហកម្មទេសចរណ៍។ រយៈពេលនោះរួមមាន ២ឆ្នាំ ធ្វើការជាមួយក្រុមបុរាណវិទ្យានៃអាជ្ញាធរជាតិអប្សរានៅក្នុងរមណីយដ្ឋានអង្គរ និង៥ឆ្នាំជាមួយទីភ្នាក់ងារទេសចរណ៍នៅរាជធានីភ្នំពេញ។ ចំណេះដឹងអំពីប្រទេសនេះ គឺមានតម្លៃមិនអាចកាត់ថ្លៃបាន ខណៈពេលដែលក្នុងឆ្នាំ២០១២ ខ្ញុំចាប់ផ្តើមធ្វើដំណើរលក្ខណៈផ្ទាល់ខ្លួន ដោយតែម្នាក់ឯង ជាមួយមិត្តភក្តិជិតស្និទ្ធ និងក្រុមគ្រួសារ ពាសពេញផ្ទៃប្រទេសដើម្បីថតរូបភាពចម្រុះនានា ថតរូបទេសភាពបណ្តាខេត្តតាមដងទន្លេមេគង្គ រាជធានីភ្នំពេញ ខេត្តជុំវិញបឹងទន្លេសាបដ៏ធំល្វឹងល្វើយ និងចុះទៅតាមភាគខាងត្បូងដល់សមុទ្រ និងខេត្តនានានៅជាប់មាត់សមុទ្រ។ ខ្ញុំឃើញភាពស្រស់ស្អាតជាសកលមួយប្រកបដោយភាពទន់ភ្លន់ ដែលធម្មជាតិបង្កើតឡើង ដោយសកម្មភាពនានារបស់មនុស្ស និងពីលំហូរនៃពេលវេលា ដែលទេសភាពក្នុងប្រទេសកម្ពុជាផ្លាស់ប្តូរឥតឈប់ឈរ។តាំងពីពេលដំបូង ដែលខ្ញុំចាប់ផ្តើមធ្វើការងារលើគម្រោងនេះ ខ្ញុំសម្រេចចិត្តថតរូបតែពេលព្រឹកព្រលឹមតែប៉ុណ្ណោះ ដើម្បីទទួលបានពន្លឺស្រទន់ពីព្រះអាទិត្យ ហើយខ្ញុំយល់ឃើញថាថ្ងៃរះជានិមិត្តរូបនៃការចាប់ផ្តើមរូបភាពថ្មីមួយនៃប្រទេសកម្ពុជា។ កម្រងរូបថតពីការធ្វើដំណើរអស់ទាំងនេះតែងតែថតឡើងដោយភាពជាក់លាក់ និងប្រាកដប្រជាបំផុត ទាំងការចាប់ប្លង់ និងកំណត់ពណ៌ ដោយគ្មានការថែមថយពណ៌ឬពន្លឺ គឺដើម្បីតែរំលេចភាពសម្បូរបែប និងភាពចម្រុះនៃទេសភាពរបស់ប្រទេសកម្ពុជា។ ការផលិតស្នាដៃនេះចំណាយពេលវេលាអស់រយៈពេល១០ឆ្នាំ ហើយខ្ញុំសង្កេតឃើញថាកន្លែងមួយចំនួនបានបាត់បង់ ឬផ្លាស់ប្តូររូបរាងគួរឱ្យកត់សម្គាល់ ដោយសារការអភិវឌ្ឍយ៉ាងគំហុក និងការសាងសង់សំណង់នានា ក្នុងប៉ុន្មានឆ្នាំថ្មីៗនេះ។

«មាតុភូមិជាទីស្នេហា» ជាការធ្វើដំណើរលក្ខណៈផ្ទាល់ខ្លួន ជាមួយនឹងការថតរូបដោយប្រើហ្វ៊ីល និងអមជាមួយសំបុត្រស្នេហាមួយច្បាប់ទៅកាន់ប្រទេសកំណើតរបស់ខ្ញុំ។ សំបុត្រនេះបង្ហាញពីអារម្មណ៍ និងមនោសញ្ចេតនាផ្ទាល់ខ្លួនរបស់ខ្ញុំចំពោះទីកន្លែងនានាដែលខ្ញុំទៅដល់ដើម្បីថតរូប។ ទីកន្លែងនីមួយៗ ខ្ញុំចំណាយពេលដើម្បីទទួលយកបរិយាកាស ស្រូបយកខ្យល់អាកាស និងទទួលអារម្មណ៍ពីធម្មជាតិ និងពីមនុស្សម្នាទាំងឡាយដែលខ្ញុំថត។ នោះដូចជាការហែកស្រោមសំបុត្រដោយប្រុងប្រយ័ត្ន ដើម្បីបើកយកសំបុត្រពីខាងក្នុងចេញមក។ បំណងរបស់ខ្ញុំចំពោះការងារនេះ គឺចង់បង្ហាញពីលំហូរដ៏ទន់ភ្លន់នៃពេលវេលា និងពណ៌ចម្រុះដ៏សម្បូរបែបនៃប្រទេសកម្ពុជាទៅកាន់ពិភពលោក។

ការធ្វើដំណើរថតរូបទៅកាន់ទឹកដីដែលមានមនុស្សជំនាន់ថ្មីអាចសង្ឃឹម និងសុបិន។

កម្ពុជា ២០១២ - ២០២២

គឹម ហាក់

គឹម ហាក់ កើតក្នុងឆ្នាំ១៩៨១ នៅក្រុងបាត់ដំបង បច្ចុប្បន្នរស់នៅក្នុងរាជធានីភ្នំពេញ។
គឹម ហាក់ កើតពីរឆ្នាំក្រោយការដួលរលំនៃរបបខ្មែរក្រហម ហើយគាត់ធំឡើងដឹងក្តីស្តាប់ឮការចងចាំឪពុកម្តាយរបស់គាត់អំពីសម័យកាលនោះ។ សព្វថ្ងៃ គាត់ប្រើការងារសិល្បៈរបស់គាត់ ដើម្បីលើកកម្ពស់ការយល់ដឹងអំពីអតីតកាលនៃប្រទេសនេះ ដើម្បីការចងចាំ លើកឡើង និងបកស្រាយឡើងវិញនូវប្រវត្តិសាស្ត្រសង្គមកម្ពុជា
មុន អំឡុងពេល និងក្រោយរបបខ្មែរក្រហម។

ការងាររបស់ ហាក់ គាត់ធ្វើការស្វែងយល់ពីប្រធានបទមួយចំនួនដែលទាក់ទងនឹងផ្ទៃក្រណាត់វប្បធម៌នៃប្រទេសកម្ពុជា រួមមានទាំងការថតរូប និងកំណត់ត្រាអនុស្សាវរីយ៍នៃទឹកដី រួមទាំងរឿងរ៉ាវអ្នកនៅរស់រានមានជីវិត (ការចងចាំ, ជំរំជនភៀសខ្លួន, ប្រទេសម្ចាស់ផ្ទះ, ប្រជាជនកម្ពុជាដែលបានចាកចេញពីប្រទេសកំណើត, ដំណើរការផ្សះផ្សារ, សហគមន៍, មនុស្សជាតិ និង ការធ្វើឱ្យរស់ឡើងវិញ), ព្រះរាជពិធីបុណ្យព្រះបរមសព ព្រះបាទ នរោត្តម សីហនុ, ការចងក្រងឯកសារស្ថាបត្យកម្ម និងទិដ្ឋភាពផ្លាស់ប្តូរទូលាយនៃស្រុកកំណើតគាត់។
គឹម ហាក់ ធ្លាប់ដាក់តាំងពិព័រណ៍ស្នាដៃជាច្រើនតាមប្រទេសនានានៅទ្វីបអាស៊ី ទ្វីបអូសេអានី ទ្វីបអឺរ៉ុប កាណាដា និងសហរដ្ឋអាមេរិក។ ការងាររបស់គាត់ចេញផ្សព្វផ្សាយលើឆាកអន្តរជាតិតាមរយៈមហោស្រពសិល្បៈ
និងមហោស្រពរូបថត ហើយមានការចុះផ្សាយក្នុងកាសែតរូបថតល្បីៗជាច្រើនផងដែរ។

http://kimhak.com/biography/
+855 12 556 539
kimhakphotography@gmail.com

សម្ភាស

កិច្ចសម្ភាសន៍ជាមួយលោក គឹម ហាក់ ដោយអ្នកដំឡើងពិព័រណ៍ឯករាជ្យ លោក Taro Amano ។

ធ្វើការតាមរយ

ដំណើរឆ្លងកាត់វិចិត្រសាល